CONTOH SAMBRAHMA WACANA

UPACARA PAWIWAHAN

            Majeng ring Pangenter Acara, titiang ngaturang suksmaning manah antuk galah sane kapica ring titiang.

            Om Swastyastu.

            Majeng ring Dane Manggala Karya sane dahat utamayang titiang;

            Ida-Dane para Atiti sinamian sane dahat wangiang titiang;

            Para semeton titiang sareng sami sane wangiang titiang;

            Pamekas ring sang ngamargiang upacara pawiwahan : Putu Raka Kusuma miwah

            Made Ayu Ari Astiti, sane tresna-sihin titiang.

            Sadurung titang nglanturang matur ngeninin Sambrahma Wacana, titiang ngaturang pangayubagia majeng ring Ida Sang Hyang Widhi Wasa. Sangkaning wara nugrahan Ida titiang ngiring Ida-Dane sareng sami sida umangguh karahayuan. Titiang taler nunas lugra majeng ring Ida-Dane para Atiti, santukan titiang kapaku sara antuk sang kalih utawi sang ngamargiang upacara pawiwahan mangda ngaturang piteket utawi Sambrahma Wacana.

            Ida-Dane miwah para Atiti sane dahat suksmayang titiang ring manah.

            Atur-uningayang titiang mungguing Upacara Pawiwahan utawi Wiwaha Samskara ugi kamargiang maka sadana mikukuhang patemon alaki rabi mawiwaha. Pawiwahan inggih punika  pidabdab ngamargiang tata titi kauripan manut pituduh Sanghyang Agama, wantah ngranjing ring papalihan Catur Asrama, utaminipun ring palih Grehastha Asrama. Dharmaning sang mawiwaha wiakti utama pisan, santukan madasar yadnya. Sajaba punika matetujon mapikuren taler ngawerdiang dharmaning kauripan, nglanturang pratisantana, ngawentenang putra suptra, oka sane uatama.

            Majeng ring Putu Raka Kusuma lan Made Ayu Ari Astiti, titiang ngaturang pangayubagia, taler setata ngastitiang ring Ida Sang Hyang Widhi Wasa, mangda prasida adung mapikuren, paras paros sarpanaya, dirgayusa tur sadia rahayu. Dumadak dumadik Ida-Dane para Atiti taler ngastitiang sakadi punika.

            Pawiwahan sane kamargiang janten malarapan sami suka utawi saling tresnain. Rasa lulut asih utawi tresna asih punika pasuecan Ida Sang Hyang Widhi Wasa. Duaning asapunika patut ngaturang suksmaning idep ring Ida saha setata mautsaha miara rasa tresna asih punika kantos kapungkur wekas. Nenten pisan obah, nenten malih nresnain anak siosan. Yening wenten pitungkas sajroning ngulati kapatutan soang-soang, ugi mangda kapuputang sareng kalih dumun. Nanging yen nenten prasida, sampunang kantos ngawetuang biota ring pikuren, tur nyandang tunasang pamatut ring rerama utawi ring sang kapineh wikan saha mrasidayang ngicenin pamatut ring wicara inucap.

            Pawiwahan sane kamargiang taler kautsahayang nenten lempas ring unteng daging Undang-Undang Nomer 1 Warsa 1974, indik Pawiwahan. Duaning asapunika sasampun puput upacara Pawiwahan punika, patut kalanturang malih nunas lekita marupa Akta Perkawinan ring sang Amawa Rat utawi Pemerintah.

            Majeng ring sang kalih, titiang taler mapiteket, mangda setata eling lan bakti ring rerama utawi sang maraga Guru Rupaka soang-soang. Taler ngamargiang sahananing yadnya sane mula patut kamargiang pinaka swadharmaning sang mawiwaha. Patut ngulati pangeweruh pinaka jalaran ngulati pangupajiwa. Patut satia, jujur, anteng makarya, taler tan mari astiti bakti ring sesuhunan utawi Ida Sang Hyang WidhiWasa maka miwah Ida Bhatara Kawitan. Lungsurang ring Ida mangda ngicen pamargi sane antar sajroning kauripan.

            Tiiang taler mapangapti dumogi sang kalih satata adung mapikuren, tur rnemu kasubagian sakala niskala.

            Ida-Dane sinamian sane utamayang titiang.

            Wantah sakadi punika daging atur Sambrahma Wacana sane sida antuk titiang nguningayang. Minab wenten tuna wiadin singsal utawi tan mantuk ring pakayunan, nawegang titiang nunas geng pangampura. Yadin samatra prasida antuk titiang ngaturang, pangaptin titiang dumadak wenten pikenoh ipun.

            Inggih puput. Om Santih Santih Santih Santih Om.